Pógódnośenja dodankow su móžnosć, aby wy dał swóje měnjenja wó dodankach k wěsći, kótarež sćo instalěrował a wužywał. Naš moderaciski team za pógódnośenja sebje pšawo wuměnja, pógódnośenja wótpokazaś abo wótwónoźeś, kótarež toś tym směrnicam njewótpowěduju.
Pokaze za pisanje wjelicnego pógódnośenja
Dobre:
- Pišćo, kaž pśijaśeloju wó swójich nazgónjenjach z dodankom wulicujośo.
- Źaržćo pógódnośenja krotke a lažko k rozměśu.
- Pódajśo specifiske a wužytne drobnostki. Na pśikład:
- Jo dodank funkcioněrował, kak sćo wótcakał?
- Kótare funkcije se wam spódobaju abo njespódobaju?
- Jo to wužytne było?
- Dajo se lažko wužywaś?
- Buźośo toś ten dodank dalej wužywaś?
- Bjeŕśo se wokognuśe casa, aby swójo pógódnośenje pśecytał, nježli až jo wótpósćelośo, aby pisańske zmólki miniměrował.
Glědajśo:
- NJezapódajśo jadnosłowne pógódnośenja ako „Wjelicne!“, „Wuběrne“ abo „Špatne“.
- Njepišćo techniske problemy, pšosby wó pomoc abo naraźenja za nowe funkcije. Wužywajśo k dispoziciji stojece móžnosći pomocy wótpowědnego dodanka město togo, jolic k dispoziciji. Namakajośo je we wótrězku „Dalšne informacije“ w bocnicy na boku drobnostkow dodanka.
- Njepišćo pógódnośenja za dodanki, kótarež njejsćo sam wužył.
- Njewužywajśo wulgarne, seksualne wuraze abo wuraze, kótarež maju za gramoty połne.
- Njewužywajśo HTML, wótkaze, žrědłowy kod abo źěle žrědłowego koda. Pógódnośenja směju jano lutny tekst wopśimowaś.
- Wopacne pódaśa cyniś, awtorow dodankow pónižyś abo jich wósobinski skśiwźiś.
- Njepomjeńśo e-mailowu adresu, telefonowy numer abo druge wósobinske daty, daniž swójske daniž te z drugich wósobow.
- Njepišćo pógódnośenja za dodank, kótaryž jo se wót was abo wašeje organizacije wuwił abo se reprezentěrujo.
- Njekritizěrujśo dodank za něco, za což jo myslony. Njezawóstajajśo na pśikład negatiwne pógódnośenje dodanka, kótaryž wabjenje pokazujo abo musy daty zběraś, jolić to jo zaměr dodanka, abo jolic dodank musy daty zběraś, aby funkcioněrował.
Cesto stajone pšašanja wó pógódnośenjach
Kak mógu problematiske pógódnośenje wózjawiś?
Pšosym klikniśo na „Toś to pógódnośenje k wěsći daś“, aby dał abo wóznamjenił póchmurne pógódnośenja k wěsći a pósćelo se k sedłoju za moderaciju. Naš moderaciski team buźo směrnice za pógódnośenja wužywaś, aby pósuźił, lěc měło se pógódnośenje wulašowaś abo nic, abo lěc měło se wótnowiś.
Som dodankowy awtor, mógu na pógódnośenja wótegroniś?
Jo, awtory dodankow mógu jadnotliwe wótegrono na pógódnośenje daś. W našom forumje móžośo diskusijnu temu wótwóriś, aby póstarcył dalšnu diskusiju.
Som awtor dodanka, mógu njepśijazne pógódnośenja lašowaś?
W cełku nic. Ale jolic pógódnośenje górjejce wopisanej směrnicy za pógódnośenja njewótpowědujo, móžośo na „Toś to pógódnośenje k wěsći daś“ kliknuś, aby se moderěrowało. Jolic pógódnośenje dypk kritiki wopśimujo, kótaryž w nowej wersiji wašogo dodanka wěcej aktualny njejo, móžomy toś to pógódnośenje wulašowaś.